জেলিয়াংরোং জাতিনা মপুঙ ওইনা খুন্দাবা তমেংলোং জিলা অসি য়াম্না চাউনা হরাও তয়াম্না পাঙথোকপা মখল মখা কয়াগী কুহ্মৈগীদমক পাক শন্না মীয়াম্না খঙনৈ। মখোয়গী অচৌবা কুহ্মৈশিংদা মশক থোকপা জগোয়-ঈশৈগী কলাবু শক্তাক্লিবা ইনাক খুল্লবা নাৎকী লনগৈগীদমক মখোয়না চাউথোকচৈ। কুহ্মৈশিং অসি মখোয়গী ধর্ম্মগা অমসুং সংস্কৃটিগী মচৎকা তৎনা থানদনা চৎমিন্নৈ। মরম অদুনা জেলিয়াংরোংগী কুহ্মৈশিং মখোয়না রোংমৈ লোন্দা ‘ঙাই’ হায়না খঙনবা জেমেনা ঙি অদুগা লিয়াংমাইনা রিজোইশিং হায়না খঙনবশিং অসি মায়থোং য়াম্বা সংস্কৃটিগী মশক থোকপা অমনি। এন: সাহানা অসুম্না হায়রম্মী মদুদি জেলিয়াংরোং জাতিনা মখোয়গী কুহ্মৈশিং চহি চুপ্পা মথং মনাও নাইনা লেপ্তনা পাঙথোকই।
ব্রাউনগী মতুং ইন্না মখোয়গী কুহ্মৈ অমসুং জগোয়শিংদা নুপাশিংগী ফিজেৎতা খাউগী মওং মানবা অঙাংবা মচুগী ফি মচেৎনা খ্বাঙগী অকোয়বদা ৱাউথাংনবা মচুনা লাংবা, শামতুগী ঙকয়েৎ ফিনা য়েৎলি অদুগা অঙৌবদা মকুপ মকুপ নম্বা ফিসু অদুম্মক ময়াম্না শিজিন্নৈ। টেনসিল লৈতেংশিং অমসুং অশেংবা উচেক মতুনা কোক্তা থেৎলি অমসুং য়াম্না পামজনা অশেংবা কুরাক্কী মশা নপশিন্দুনা মশাগুম্বা অমনা নাদগী থিন্দোরকই। মখাগী মওংশিং অসি জেলিয়াংরোং কুহ্মৈগী মচৎশিংনি।
কুহ্মৈশিং অসি অপুনবা খুঙ্গং সমাজগী লাইগী থৌরম ওইনা লৌই। অথোইবা ঈশ্বর, লাইরেম্বা/লাইরেম্বী, খুনগী লাইশিং অমসুং ইপা ইপুশিংগী মমি তাই।
জেলিয়াংরোং অসি অয়াম্বনা লৌউ-শিংউবা ঙাক্তা ওইবনা মখোয়গী কুহ্মৈশিং অসিদা লৌউ-শিংউগী তোঙান তোঙানবা তাঙ্কক কয়াগী মমি তাই। কুহ্মৈশিং অসি মতমগী মতুংইন্না অকক্নবা লৌউগী থবক তাকপা ওইনা পাঙথোকপনি।কুহ্মৈশিং অসি মতম পুম্নমক্তা থবক শুদুনতা লৈবা জেলিয়াংরোং জাতিগী হরাও তয়াম্বা ফোংদোকপনি। মসি মখোয়গী কালাগী হৈশিংবা অমদি পাঙ্গলগী মতেংনা লানগী মহৈশিং,জগোয় অমসুং ঈশৈশিং উত্থোকপগী থৌরম অমনি।
কুহ্মৈশিং অসিনা জেলিয়াংরোং খুনগী তোঙান তোঙানবা সমাজগী সংস্থানশিং কুহ্মৈশিং অসিবু শিল লাংবদা কোনশিল্লি। মখোয়গী নুপাগী তুম্ফম কা (খাংচিউ অমসুং নুপীগী তুম্ফম কা (কাইলু)না থবক থৌরমশিংদা মরু ওইবা থৌদাং লৌই। তুম্ফম কাগী চৎনবী অসি মরায় চায়থরক্লবসু কুহ্মৈশিংদা মসিনা থবক থৌরমশিং পাঙথোকপগী অচৌবা মফম অমা ওইরি। কনাগুম্বশিংনা তুম্ফম কাবু ঙাইকাই,কুহ্মৈগী য়ুম হায়নসু কৌই।
জেলিয়াংরোংশিংনা কুহ্মৈশিং অসি মখোয়গী কেলেন্দরগী মতুংইন্না থা খুদিংগী পাঙথোকই। কুহ্মৈশিং অসি পাঙথোকপা মতমদা জেলিয়াংরোং জাতিগী মরক্তা নাগালেন্দগী পেরেন সব-ডিভিজনগী মথক থংবা মফম, অসামগী হফ্লোংগী চীংশাং পরেং অমসুং মণিপুরগী তমেংলোং জাতিগী মরক্তা খেন্নবা খরা লৈ। কুম্মৈশিং অসি মখাগী অসুম্না পাঙথোকইঃ:
| সে:নং: | জেমে | লিয়াংমাই | রোংমৈ |
|---|---|---|---|
| ১। | রোদিলাইঙি | চাগা | গান-ঙাই |
| ২। | হেগা -ঙি | অলেমঙি | রিহ-ঙাই |
| ৩। | হেনা জৌঙি (কেটৌঙি) | কোনবুটঙি | নানু-ঙাই |
| ৪। | হে-টাঙি | চারা-অলিমঙি | গিনকি-ঙাই |
| ৫। | হেরাসামঙি | চাগিয়াংখাঙি | গুদুই-ঙাই |
| ৬। | হেটাটিংঙি | খামঙি | টুন-ঙাই |
| ৭। | কোরিয়াকটিংঙি | টিয়াংঙি | টিয়ান-ঙাই |
| ৮। | কোপোঙি | পুকপাটপাংঙি | পোক ফা-ঙাই |
| ৯। | ঙলেমঙি | চকাঙি | চকাক ঙাই (বানচাট ঙাই) |
জেলিয়াংরোং খুদিংমক্না পাঙথোকপা জেলিয়াংরোং কুহ্মৈশিংগী মরমদা মখাদা ¬শন্দোক্না তাক্লিঃ
| সে:নং: | কুহ্মৈ | অকুপ্পা ৱারোল |
|---|---|---|
| ১। | গান-ঙাই | ডিসেম্বরদগী জনুৱারি,মণিপুরি থাচৎতনা পোইনু অমসুং ৱাকচীঙ থাদা নুমিৎ মঙানি চুপ্না পাঙথোকই। |
| ২। | রিহ-ঙাই | (লানগী কুহ্মৈ)জনুৱারিদগী ফেব্রুৱারি ফাওবদা নুমিৎ হুম্নি পাঙথোকই। |
| ৩। | নানু-ঙাই | ফেব্রুৱারিদগী মার্চ ফাওবদা নোংমগী ওইনা অঙাং না-হুৎপগী পাঙথোকপা কুহ্মৈনি। |
| ৪। | গিংকি-ঙাই | অতিথিবু চাক পীজদুনা এপ্রিল থাদা নোংমগী ওইনা লাইরেম্বা অমসুং লাইরেম্বী অনিদা খুরুমজবা অমসুং ফৌ মরাং কায়না লোক্নবা ফৌগী থৱায় কৌথবগী কুহ্মৈনি। |
| ৫। | গুদুই ঙাই | মে থাদা নোংমাগী ওইনা পাঙথোকপা শিং থকপগী কুহ্মৈনি। |
| ৬। | গনথন লাইথন বপমৈ ঙাই | অনৌবা মনা মশিং মহাও তংবগী য়েন্নিং থাদা পাঙথোকপা নোংমাগী ওইবা কুহ্মৈনি। |
| ৭। | টুন-ঙাই | (নোংজু কুহ্মৈ) নি। জুন-জুলাইদা নোংমাগী ওইনা পাঙথোকপনি। |
| ৮। | টিয়ান-ঙাই | জুলাই -আগষ্টতা পাঙথোকপা নোংমাগী ওইবা তলগী কুহ্মৈনি। |
| ৯। | পোক ফা-ঙাই | সেপ্তেম্বর থাদা পাঙথোকপা নোংমাগী ওইবা লৌরোক মমাংগী পোথাবগী কুহ্মৈনি। |
| ১০। | চকক-ঙাই | খুল খরদা লৈখিদ্রবশিংগা মরি লৈননা নভেম্বর থাদা নুমিৎ তরেৎনি পাঙথোকপা কুহ্মৈনি। |
জিলা অসিদা পাঙথোকপা কুহ্মৈশিংগী মরমদা শম্লপ্পা ৱারোল:
- গান-ঙাইঃ কুহ্মৈ অসি জেলিয়াংরোং জাতিগী য়াম্না মরুওইবা নিংথম থাগী মতমদা লৌরোক পান্থাগী মতুংদা পাঙথোকপা কুহ্মৈনি। গান-ঙাই হায়বদি নিংথম থাগী ইকং থাদা পাঙথোকপা কুহ্মৈ হায়বনি। কনাগুম্বা খরগী মতুং ইন্না হায়রগদি মসি অহিংবা অমসুং লৈখিদ্রবশিংগী য়ানশিন্নবা কুহ্মৈনি হায়না ফোংদোকই। গান-হায়বদি য়ানশিন্নবা হায়বনি। লিয়াংমাই দদি মসি চাগা-ঙি হায়না খঙনৈ। জর্জ ৱাট কী মতুং ইন্নদি মসি ডিসেম্বর থাদা ইহান হান্না পাঙথোকপা কুহ্মৈনি। নুমিৎ মঙানি চুপ্না পাঙথোকপা কুহ্মৈ অসিদা খুনগী মীওইশিংনা লৈজবা নিংথিজবা ফিজোল শেত্তুনা জগোয়-ঈশৈ পাঙথোকই অমদি অতেনবা মতমগী পোত্থাবা অমসুং চাক্লেন কৎপনা মরক থৎলি।কুহ্মৈ অসি চহি হৌবগী পাউজেল পুদুনা মৈবা চিংলগা পুথোকপা অশেংবা মৈনা য়ুমথোং শিৎনা য়েল্লি। মমাং চহিদা লৈখিদবশিংগী থৱায়শিং অদু কায়নবগী থবক পাঙথোকই। লৈখিদ্রবশিংবু ইকায় খুম্নবা উত্তুনা জগোয় পাঙথোকই। অঙাংশিংগী মরক্তগী শাশিন্নবা নিংথৌ অমসুং মহারানিগী মফমদা জগোয় উৎলি। চহি য়ামখৎলক্লগদবশিংদনা কায়নবগী জগোয় উৎলি। শান্না খোৎনবগী চাংদম্নবসু পাঙথোকই। নুঙ লংবা, মাঙজোং, অমদি তা লংবনচিংবা উত্তুনা শান্ন-খোৎনবগী চাংদম্নবা পাঙথোকই। কুহ্মৈসিগী মনুংদা জেলিয়াংরোংশিংগী জগোয় পাঙথোকই। নুপামচা অমুং নুপীমচাশিংগগী মরক্তা ঈশৈ চাংদম্নৈ। খুন ঙাকপগী ফজরবা অপুনবা ঈশৈ শকপশিং অসি জেলিয়াংরোং জাতিগী কালা অমসুং লান্মী ঙাকপগী পুন্সি মহিং তাকপা মপা লৈত্রবা শিংথানিংঙাই ওইবা শক্তম অমনি।
- রিহ – ঙাই (লানগী মশক তাকপা কুহ্মৈ): রিহ ঙাই হায়রিবা কুহ্মৈ অসি খুন অমসুং লানমীশিংবু শেংদোকপগী ধর্ম্মগা মরী লৈননা পাঙথোকপা কুহ্মৈনি। জর্জ ৱাটনা হায় মদুদি কুহ্মৈ অসি জনুৱারি থাদা নুমিৎ হুম্নি (৩) পাঙথোকই। কুহ্মৈ অসিগী মনুংদা নুমিৎ অমদা নৎত্রগা অহৌবা নুমিত্তা নুপা অমসুং নুপীশিংনা মীপুম খুদিংনা শীজিন্নগদবা তঙাই ফদবা ঈশিং তোঙান্না পুরকই। নুপানা ওক হাৎলগা শরুক অমনা মশা মশানা লৌই অদুগা শরুক অমনা নুপীশিংদা পীরগা মখোয়না থোংদুনা তোঙান তোঙান্না চাই। চাবা মতমদা নুপাশিংনা শাগৈগী মকোক থোংবা য়ুমদা চায় অদুগা নুপীশিংনা মশা মশাগী য়ুমশিংদা চায়। লফুনা শাবা মিতম উদা য়ানখৎলগা মচিন তুম্বা ৱা নৎত্রগা চৈ না লংশিল্লি। কুহ্মৈ অসিদা মপা মপু ওইবাশিংগী মংফমদা য়ু খিকচিল্লি। মসিমক মখোয়গী লম অদুদা লাক্কদবা চহিদা লৌউবগী অমসুং মীয়ামগী য়াইফনবনি।
টি.সি হডসনগী মতুং ইন্না রিহঙাই কুহ্মৈগী মতমদা জেলিয়াংরোংগী মীশিংনা অফ-ফত্তগী খুদম চাংদম-চাংয়েং পাঙথোকই। মরম অসিনা অফবরা ফত্তবরা খঙনবগীদমক মখোয়না খুনগী মপান্দা চরুনা নৎত্রগা লফুনা শাবা মিতম অমা থম্মগা তা লংই। তা-দুনা মকোক্তা পাল্লবদি লংলিবা মীওই অদুনা কোক অমা ফংগনি অদুগা পুক্তা পাল্লগনা মহৈ মরোং ফগনি। মখা তানা করনেল এম সি কুলোনা হায়, ‘‘কুহ্মৈ অসি মপা মপুশিংবু ইকায় খুম্নবা উৎপনি অদুবু শুপ্নগী উরিবা খুদমদি হৌখ্রবা মতম্বু নীংশিংবা ওইনা লৌউ-শিংউবগা মরি লৈননা মঙফমশিংদা খিকপা-চাইবা অদুনি, রিহঙাইগী কুহ্মৈ অসিদা ‘‘রিহটক গানমৈ’’ অমসুং ‘‘ রিলিয়ানবুই ফিয়ানমৈ’’ নৎত্রগা চোংফিয়ানমৈ’’ পাঙথোকই। পাঙথোক্লিবশিং অসি খুল শেংদোক্নবনি। - নানু ঙাই (না হুৎপগী কুহ্মৈ): কুহ্মৈ অসি মমাং চহিদা পোকখিবা অঙাংশিংবু অহল ওইরবী নুপীশিংগী য়ুমদা মিং চনবগী পাঙথোকপা কুহ্মৈনি। মসি ধর্ম্মাগী মতিক মগুন হেনগৎহন্নবগা শাগোন্নৈ অমদি অহল ওইরবা নুপা অমসুং নুপীশিংনা ঈশৈ পুন্না শকমিন্নৈ। অঙাংশিংনা‘‘নিয়াক কাইবাং’’(লৈবাক্কী তুম্ফম কা) হায়না খঙনবা তুমফম কাদা লৈগনি। অঙাংশিং অদুনা লৈখোম পেক্লগা য়ুম খুদিংদা খরা খরা নপশিনগনি। অহল ওইরবি নুপীশিংনা অঙনবা অয়ুক্তা পোকপদা ঙায়রিবা অঙাংশিংবু মনা হুৎনবা ঈশিং শোকপা চৎকনি। কুহ্মৈ অসিদা য়েন অনি হাত্তুনা অফ-ফত্তা খুদম চাংয়েং তৌগনি। য়েনবি অনি হাৎলিবসি অমনা ‘‘সংদাই’’অদুগা অমনা‘‘সংগ্রৌ’’গীদমক্নি। অহল ওইরবা নুপাশিংনা য়েন অদুনা চৎপগী খোঙথাং কুপ্না য়েংগনি। উচেকতুগী মখোঙনা য়েৎলোমদা থাংলবদি অঙাং অদুগী পুন্সি অদু য়াইফবা, মশা-মউ ফবা অমসুং পুন্সি নুংশাংবগী খুদম চাংদম তাক্লবনি। জর্জ ৱাটকী মতুং ইন্না ‘ফেব্রুৱারি থাদা নুমিৎ ৩নি চত্থবা কুহ্মৈ অমা লৈ মসিদা মমাংদা পাঙথোকখিবা অসিগুম্বা মখলগী কুহ্মৈগী মতমদা পোকখিবা অঙাংশিংগী মনা হুৎকনি’। হায়রিবা কুহ্মৈ অসি অখন্ননা অঙাংশিং অমসুং পোকপদা ঙাইরিবশিংবু য়াইফরোল পীনবগীদমক্তনি।
- গিনকি ঙাই (গিন-অতিথি, কিমৈ-পেলহনবা): কুহ্মৈ অসি লল-থুমগী লাইরেম্বা অমসুং লাইরেম্বীবু পুক্নিং পেলহন্নবা পাঙথোকপনি। নপকাও(ফৌগী থৱায়বু কৌবা) অসি খুনগী মীওই কাংলুপশিং অমসুং লন্নাই য়ুমগী মীওইশিংনা পাঙথোকই। অতিথিবু সেবা তৌবা হায়বসি তশেংবদি অতিথি নত্তে মখোয়গী মপা-মপুশিং অমসুং ইমুংদুগী লৈখিদ্রবশিংগী থৱায়নি হায়না লৌই। মখল কয়াগী চানবা চিঞ্জাক থোঙগী পাম্বোমগী মথক থংবা শরুক্তা থমগনি। মসিবু য়ুমদুগী খ্বাইদগী অহল অদুনা গিনকিমাই হায়না পাঙথোক্কনি ।
- গুদুই ঙাই (গু-শিং, দুই-মহী): গুদুইঙাই কুহ্মৈ হায়বা কুম্মৈ অসি মরু মরাং হুনবা মতম নৎত্রগা কুহ্মৈ মতমদা পাঙথোকই। জর্জ ৱাট না হায়,‘ কুহ্মৈ অসিগী মতমদা মরু মরাং হুনগদবা লমগী শরুকশিং অদু নিঙথিনা শেংদোকই অমসুং শেংদোক্লবা মতুংদা গুদুই জাংমৈ হায়রিবা কুহ্মৈ অসি শিংগী মহী থক্তুনা পাঙথোকই।। মসি অসুম্না হায় মদুদি শিং মহী থক্লিবা অসি চহি চুপ্পা ঈ শেংদোক্নবা অমসুং হকচাং ফনা লৈনবগীদমক্তনি। মহী অসি ঈশ্বরগী মিংদা থকপনি। টিংকাউ রাগাৱাং হায়বা অথোইবা ঈশ্বরদা অফবা লৌরোক অমসুং মহৈ মরোং মরাং কায়না পুথোক্নবগীদমক্তা খুরুম্বগী থবক পাঙথোকই। ঈশ্বরগী মফমদা কত্থোক্লবা য়েনগী মহী অদু শিংগী মহীগা য়ানশিন্নরগা থকই। মরম অসিদগী গুদুই ঙাই (শিংগী কুম্মৈ) হায়না কৌরিবনি। নুমিৎ য়ুংবা মতুংদা নুপামচা অমসুং নুপীমচাশিংগী মরক্তা লৈ চবুল লংশিন্নবা অমসুং থৌরি চিংবি শান্নৈ। মসি ফৌ লোক্নবগীদমক নুপা অমসুং নুপী ঈশ্বরগী মরক্তা শান্নবা অদুগা চপ মান্ননা মহুৎ শিন্দুনা শক্তাক খুদম ওইনা পাঙথোকপনি। করিগুম্বা থৌরি চিংবি অদু নুপীনা ঙম্লবদি লাক্কদবা চহিদা অফবা লৌরোক্কী খুদম্নি।
- গনথন লুইথন বপমৈ ঙাইঃ কুহ্মৈ অসি অকক্নবা জেলিয়াংরোংগী খুন অমনা ঈশ্বর পুম্নমকপু খুরুমদুনা চহিগী ওইনা অনৌবা মনা মশিংশিংবু মহাও তংদুনা কৎপগী কুহ্মৈনি।
- টুন-ঙাই (নোংজু কুহ্মৈ): কুহ্মৈ অসি নোংজু পান্থাদা নহা অমসুং নুপীমচাশিংনা উমং কোক্তুনা অমদি পুখ্রি শেংদোক্তুনা লৌফমগী লম্বীদা ‘বামদুআনমৈ’ অমসুং ‘কাংবিয়ান রামৈ’ হায়না খঙনবা পোত্থাফম ময়াম পুন্না থবক শুমিন্নদুনা শেম্বা নোংজু পান্থাদা পাঙথোকপা কুহ্মৈ অমনি। মখোয় মশেল চাক চাননবা পৈশা খায়গৎনৈ।
- টিয়ান-ঙাই (তলগী কুহ্মৈ): নুপীমচাশিংনা লুচিউদা পুন্দুনা তল শেম্লগা নুংঙাইথোকপা কুহ্মৈ অমনি।
- পোক ফা ঙাই: কুহ্মৈ অসি ফৌ মুল্লকপা অদুগা মদুবু খুনগী মীশিংনা মপুং ওইনা লোক্ত্রিঙৈ মমাংদা পোত্থাবগী কুহ্মৈ অমনি। খুনগী মীওইশিংনা ফৌ লোকএ অমসুং অহানবা লোকপা ফৌ অদু ‘নাপগুই লামৈ’’ অমসুং ‘‘নাপথান বাপমৈ’ হায়না খঙনদুনা মহাও তংই। মসি পোত্থাবা অমসুং অফবা লৌরোক্কী আশা তৌবা কুহ্মৈনি। মীশিংনা ঈশ্বরগী মফমদা মরাং কায়বা লৌরোক্কীদমক খুরুম্মী।
- চকক ঙাইঃ কুহ্মৈ অসি পোকফাগী মতুং অমসুং গান-ঙাইগী মমাংমক্তদা পাঙথোকই। লৈখিদ্রবশিংগী ফুরা অমসুং মংফমশিং চপচানা শেংদোকই। লৈখিদ্রবশিংগী থৱায়শিংগীদমক্তা পুক্নিং চিংশিল্লি। অঙাংশিংবু মরু কোকথোকই অমসুং অহল ওইবশিংনা মখোয়দা থৌজাল পি। খুনগী পুরোহিৎশিংনা মখোয়গী ফিদা ফংদ্রবসু খুনগী ফত্তবা লাইশিংবু তান্থোকই। জেমে সমাজগী ওইনদি কুহ্মৈ অসিদা মীপুম খুদিংমক্না কুহ্মৈ অসিগী মমাংদা অমসুং মমাং চহিদা লৈখিদবশিংগীদমক্তা অৱাবা ফোঙদোকই। নুপামচা অমসুং নুপীমচাশিংগী তুম্ফম কাদা হরাও নুংঙাইবা পাঙথোকপা য়াদে। হোই লাউবা অমসুং জগোয়-ঈশৈ অথিংবা থম্মী। অৱা-অনা তারবা ইমুংগী মীওইশিংনা ঈরুজবা অসি মশা শেংদোকপগী মথৌনি হায়না তৌরবা মতমদতা কুহ্মৈ অসি য়াওবা য়াই।
- বানচৎ ঙাইঃ কুহ্মৈ অসি তোঙান তোঙানবা জেলিয়াংরোংগী খুনশিং হায়বদি লুৱাংগাং (নুংনাং) খুন গুম্বতনা পাঙথোকই। মসি মপুং ওইনা লৌরোক্কী মতুংদা পাঙথোকপা ‘দুৱাংজৌমৈ’গী কুহ্মৈ নি। দুৱাংজৌমৈ হায়বদি চেঙ্গৈ ফৌগৈ য়েংবা হায়বনি। খুনগী অহল ওইবশিংনা কোয়না চত্তুনা চৈঙ্গৈ ফৌগৈ খ্বাইদগী য়াম্না লৈবা মফম থিদোকই। খ্বাইদগী য়াম্না লৈবা মীওই অদুনা মখোয়গীদমক্তা চাক্লেন লাংগনি অমসুং মখা তারকপদা য়াইফ-থৌজাল পীগনি।
- মটুইমৈ ঙাইঃ কুহ্মৈ অসি জেলিয়াংরোং নাগা নহারোলগী লৌরোক লোয়বগা পাঙথোকপা চহিগী ওইবা অচৌবা কুহ্মৈ অমনি। মসিদা চাকচা হৈজনবা অমসুং পুন্না জগোয় শামিন্নবা য়াওরি। কুহ্মৈ অসি নহারোলশিংনা মখোয়না খায়গৎনবা শেনফম্না পাঙথোকপা অমসুং তোপ তোপ্পা হরাও তয়াম্বা ফোংদোকপগী কুহ্মৈ ওইবনা চাং নাইনা পাঙথোকপা ঙমদে। মসিগীসু মথক্তা চহি খুদিংগী পাঙথোকপা চহিগী কুহ্মৈ অসিদা এনথ্রোপোলোজিষ্টশিংনা অফবা মওংগী চাকচা-হৈজানবগী মথক্তা অহেনবা লল-থুম য়েন্থোকপগী অফবা থবক অমসু য়াওরি হায়না লান্না পাউথোকই। অসিগুম্বা খুনগী মীওইশিংদা কত্থোকপগী থবক অসিবু ‘টরাং নৎত্রগা বানরু দুংমৈ’ হায়না খঙনৈ। অসিগুম্বা অখন্নবা চাক্লেন অসি মথৌনা লৈবা, ইনাক-কৈরাক খুনবা, মীওইবগী য়াইফনবা খনবা অমসুং পুকচেল চাওবা মীওইশিংনা মী অমসুং ঈশ্বরবু পেন্নবা পাঙথোকপা কুহ্মৈগী তাঞ্জা অমনি।
- কমলাগী কুহ্মৈঃ কমলাগী কুহ্মৈ অসি চহি খুদিংগী দিসেম্বর থাগী অহানবা নৎত্রগা অনিশুবা চয়োলদা মণিপুরগী মীয়াম্না থৱায় য়াওনা তমেংলোংদা পাঙথোকই। কুহ্মৈ অসি শক ২০০১ দগী মতম অমাগী তমেংলোংগী ডিপুটি কম্মিস্নর শ্রী কে মোজেস চলাইগী মতমদা পাঙথোকপা হৌখিবদুনা ঙসি ফাওবা জিলাগী থাক্তা তমেংলোং ডিষ্ট্রিক্টকী মফম কয়াদগী কমলা খোমগৎলগা মতিক থোকপা মওংদা পাঙথোক্লি। কুহ্মৈ অসি কোন্নথংদা শক ২০০৪ দা হান্নগী চিফ মিনিষ্টর শ্রী ও ইবোবি অমসুং (পাৱর এন্দ হোরটি এন্দ সোইল কঞ্জরভেসন, আই পি আর মিনিষ্টর শ্রী গাইখাঙমনা রাজ্যগী থাক্তা লাউথোকখি। শক ২০১৩ দা মতম অমগী মণিপুরগী রাজ্যপালনা চহি খুদিংগী ডিসেম্বর মাপলবু ‘কমলা গী নুমিৎ’ হায়না লাউথোকখি। মসিগী মতুং ইন্না শক ২০১৪ গী কমলাগী কুহ্মৈ অসি তমেংলোং ডিষ্ট্রিক্ট হেদ ক্বার্টরদা দিসেম্বর ৯ দা পাঙথোকখি। মখল কয়াগী উহৈ অমদি হেন্দিক্রাফ্টকী পোত্থোকশিং মরাং কায়না য়োন্নবা থেন্দুনা থম্লিবা অঙাংবা মচুগী কুহ্মৈ অসি কমলাবু পামজবা কয়াগী মফমদদি অচৌবা চাক্লেন অমগুম্বনি। কমলা কুহ্মৈ অসিগী মরুওইবা পান্দমদি মণিপুরদা কমলা থাবদা খ্বাইদগী চুনবা মফম ওইরিবা জিলা অসিগী কমলা থারিবশিংগী অনিংবা অমসুং অপাম্বা য়োকখৎনবনি।